اسلام آباد۔12اپریل(اے پی پی)پاکستان مسلم لیگ ن دے رہنما اتے سابق وزیر خزانہ مفتاح اسماعیل آکھیے جو ساݙی حکومت کوں ملکی تاریخ دا سب توں وݙا خسارہ ترکے اچ ملیے، خسارے تے قابو پاوݨ اتے ملکی معیشت کوں درست سمت تے سٹݨ دی پوری کوشش ہوسی، معیشت کوں تکڑا کرݨ اتے عوام کوں سوکھ ݙیوݨ کیتے اقدامات شروع کر ݙتن۔ اے ڳالھ انہاں سینیٹر مصدق ملک اتے سابق گورنر سندھ زبیرعمر نال پریس کانفرنس کریندے آکھی۔ انہاں آکھیا جو وزیراعظم شہباز شریف دے ڳھٹو ڳھٹ ماہانہ اجرت 25 ہزار روپے کرݨ اتے پنشن اچ 10 فیصد ودھارے نال غریباں کوں ریلیف ملسی، تاجر اتے صںعتکار سودھا میڈیا وی ہک لکھ روپے تئیں تنخواہ آلے ملازمین دیاں 10 فیصد تنخواہیں ودھاون جیندے کیتے حکومت ودھ تعاون کریسی۔ انہاں آکھیا جو سٹاک ایکسچینج اچ بہتری اتے روپے دے قدر تکڑی تھیوݨ چنڳی ڳالھ اے جو تاجر و صنعت کار برادری ساݙے تے اعتماد ݙکھائے۔ انہاں آکھیا جو مایوسی دی بجائے حقائق ݙسݨ چاہندوں جو اڄ مالی خسارہ 4 ہزار ارب روپے ڄیڑھا 5600 ارب روپے پڄݨ دا چنتا اے، 800 ارب روپے دی ضمنی گرانٹس، ایس این جی پی ایل کوں 220 ارب روپے، جینکوز کوں 73 ارب روپے اتے آئل و بجلی دی سبسڈی کیتے 373 ارب روپے دی بارودی سرنگ شہباز شریف دے اڳو وچھائی ڳئی اے، تحریک انصاف تاریخی قرضہ چھوڑیے، ایں سال صرف پرائمری خسارہ 1600 ارب توں ودھ اے اتے تجارتی خسارہ تاریخ دی ودھ اے، پچھلے ہک مہینے اچ زرمبادلہ دے ذخائر 500 کروڑ ڈالرز ڳھٹین، اساں ادائیگیاں دے توازن کیتے پورا زور لیسوں، پی ایس ڈی پی دا ولا جائزہ ڳھنسوں، ایں سانڳے سارے مہانگ دا ٻھار غریب عوام کوں چاوݨا پئے، اساں عوام دے مفاد دا کم کریسوں۔ سابق گونرسندھ زبیرعمر آکھیے جو تحریک انصاف ساݙھے 3 سال صرف نعریاں تے گذارین، کوئی پالیسی کائنا ہئی، آئی ایم ایف دا ملک کوں وݙا نقصان تھئے، مہانگ اتے غربت تے قابو پاوݨ ساݙی ترجیح اے۔
