اسلام آباد۔19جولائی(اے پی پی) وزیراعظم محمد شہباز شریف آکھیے پاکستان تے عمان دے تعلقات سانجھی تاریخ، عقیدے ،ثقافت تے ڳھنڈیے پئن۔انہاں پاکستان تےعمان وچال وکھرے شعبیں خاص کر تجارت، سرمایہ کاری، توانائی تے دفاع اچ ݙو پاسے تعاون مزید تکڑا کرݨ دی خواہش ظاہر کیتی ۔وزیر اعظم آفس دے میڈیا ونگ توں جاری پریس ریلیز موجب وزیراعظم محمد شہباز شریف نال سلطنت عمان دے سفیر فہد سلیمان خلف الخروسی دی وزیراعظم ہاؤس اسلام آباد اچ ملاقات تھئی اے۔وزیراعظم مسقط دے ضلع وادی کبیر اچ امام بارگاہ علی بن ابو طالب تے تھیوݨ آلے بزدلانہ دہشت گرد حملے دی شدید مذمت کیتی جیں دے نتیجے اچ چار پاکستانی شہریاں سودھے چھی بندے جاں بحقتے 30 توں ودھ زخمی تھئن ، جنھاں اچوں تقریباً سارے پاکستانی ہن۔وزیراعظم حملے اچ شہید تھیوݨ آلے پاکستانیاں دیاں میتاں دی وطن واپسی تے زخمیاں دے علاج سانڳےعمان دی طرفوں وختی اقدامات اتے پاکستانی سفارتخانے نال تعاون دی تعریف کیتی ۔ وزیرِاعظم عمان کوں دہشت گردی دی عفریت نال نبݨݨ سانڳے پاکستان دے تعاون دی پیشکش کیتی۔ملاقات اچ وزیراعظم سلطان ہیثم بن طارق سانڳے آپݨی نیک خواہشات دا اظہار کیتے جݙاں جو سلطان نال عید الاضحیٰ تے عید الفطر دے موقع تے تھیوݨ آلی ٹیلیفونک ڳالھ مہاڑ دا ذکر کیتا ۔ وزیراعظم سلطان ہیثم بن طارق کوں وختی پاکستان دا سرکاری دورہ کرݨ دی آپݨی گزریل کیتی ڳئی دعوت دا اعادہ کیتے ۔ وزیراعظم آکھیے پاکستان اتے عمان دے تعلقات سانجھی تاریخ، عقیدے تے ثقافت تے گھنڈیے پئن۔ انہاں پاکستان دی طرفوں ݙوہیں ملکاں وچال وکھرے شعبیں خاص کر تجارت، سرمایہ کاری، توانائی تے دفاع اچ ݙو پاسے تعاون کوں ٻیا تکڑا کرݨ دی خواہش ظاہر کیتی۔وزیراعظم تجارت تے سرمایہ کاری اچ تعاون سانڳے وفد کوں آندے ہفتے پاکستان دا دورہ کرݨ دی ترغیب ݙیوݨ تے سفیر دا شکریہ ادا کیتے تے انہاں کوں یقین ݙیوائے متعلقہ حکام سانجھے طور تے فیدہ مند نتیجے گھنݨ سانڳے وفد کوں مکمل تعاون ݙیسن ۔عمان دے سفیر وزیر اعظم دا شکریہ ادا کیتا اتے عمان دے سلطان دی طرفوں نیک خواہشات دا اظہار کیتے۔ انہاں اپݨے ملک دے پاکستان نال تجارتی تے سرمایہ کاری دے تعلقات مزید ودھاوݨ دی خواہش دا اعادہ کیتا۔
