اسلام آباد۔24دسمبر (اے پی پی) وزیراعظم محمد شہبازشریف آکھیا جو پاکستان دے خلاف تھیوݨ آلی سازشاں ناکام ٻݨیسوں، ایٹمی پروگرام تے کوئی سمجھوتہ کائنا تھیسی، امید اے جو پی ٹی آئی نال مذاکرات دی کامیابی نال ملک اچ امن تے معاشی استحکام امسی۔ قومی یکجہتی اتے اتحاد کیتے پی ٹی آئی نال خلوص نال ڳالھ کریسوں۔ اے ڳالھیں انہاں منگل کوں وفاقی کابینہ دے اجلاس اچ ڳالھ مہاڑ کریندیں ہوئیں آکھی۔ وزیراعظم آکھیا جو گزریل کڄھ مہینے اچ دہشت گرداں دے حملے ودھین، کڄھ ݙینھ پہلے خوارج دے حملے اچ 17 جوان شہید تھین۔ وزیراعظم کابینہ دے اجلاس اچ شہیداں دے درجات دی بلندی کیتے دعا کرائی۔ وزیراعظم نیشنل ڈیفنس کمپلیکس اتے ٻئی دفاعی پابندیاں کوں بلاجواز قرار ݙیندیں ہوئیں آکھیا جو پاکستان دا ایٹمی پروگرام جارحانہ کائنی، اے سو فیصد پاکستان دے دفاع اتے ڈیٹرنس کیتے اے۔ دفترخارجہ ایں بارے جامع اتے مربوط جواب ݙتے پر اے طے اے جو اے پروگرام چووی کروڑ عوام دا اے اتے اساکوں ہر شئے توں ودھ تے عزیز اے۔ ایں تے کوئی سمجھوتہ کائنا تھیسی۔ وزیراعظم پاکستان تحریک انصاف نال سپیکر قومی اسمبلی ولوں ڳالھ مہاڑ کوں خوش آئند قرار ݙیندیں ہوئیں آکھیا جو میں مشورے نال اسحاق ڈار، رانا ثنا اللہ ، عرفان صدیقی ، راجہ پرویز اشرف، نوید قمر، ڈاکٹر مقبول صدیقی، علیم خان ، اعجاز الحق اتے خالد مگسی دی کمیٹی ٻݨا ݙتی اے۔ قومی فیدے کیتے اساں آپݨے ذاتی فیدے کوں تابع کروں اتے ذاتی پسند اتے نا پسند کوں قوم کیتے قربان کروں۔ وزیراعظم قومی یکجہتی تے اتحاد تے زور ݙیندیں ہوئیں آکھیا جو سپیکر قومی اسمبلی دے احسن کم تے حکومت خلوص نال اڳوں ودھسی اتے توقع اے جو ݙوجھے پاسوں وی ایں جذبہ ݙکھایا ویسی۔ وزیراعظم دہشت گردی دے واقعیاں دا ذکر کریندیں ہوئیں آکھیا جو گزریل ݙینھ اساݙی سکیورٹی فورسز ٻئے اٹھ خوارج کوں جنہم رسید کیتے اتے سپہ سالار جواناں کوں حوصلہ ودھاوݨ کیتے آپ وانا ڳئے۔ وزیراعظم آکھیا جو ملک اچ ولا سر چاوݨ آلی دہشت گردی دے پورے خاتمے تئیں ملک دی ترقی تے خوشحالی کیتے اساݙی کوششاں دے فیدے عوام کوں نہ مل سڳسن۔ انہاں پاراچنار اچ فرقہ وارانہ تصادم دے افسوسناک واقعے کوں بدقسمتی قرار ݙتا۔ وزیراعظم کابینہ کوں ݙسیا جو وزیرداخلہ خیبر پختونخوا دا دورہ کیتے اتے او کابینہ کوں اتھ دی صورتحال تے اعتماد اچ ڳھنسن۔ وزیراعظم معاشی صورتحال تے اطمینان کریندیں ہوئیں آکھیاجو سٹیٹ بینک پالیسی ریٹ ڳھٹا تے 13 فیصد کر ݙتے۔ مہانگ پنڄ فیصد توں ڳھٹ تے آڳئی اے۔ برآمدات ودھدی پئن، ترسیلات زر ، آئی ٹی ایکسپورٹس وی ودھدی پئن۔ بنگلہ دیش نال ہک نواں تعلق ٻݨدا پئے۔ وزیراعظم کابینہ کوں قاہرہ اچ بنگلہ دیش، انڈونیشیااتے ترکیہ سودھے مختلف ملکاں دی قیادت نال تھیوݨ آلی ڳالھ مہاڑ تے اعتماد اچ ڳھدا۔
