اسلام آباد۔12جولائی(اے پی پی) پاکستان تے آذربائیجان ݙو پاسے تجارت اتے سرمایہ کاری دے تعلقات ودھاوݨ تے اتفاق کیتے۔ وزارت توانائی (پٹرولیم ڈویژن) توں اعلامیہ موجب آذربائیجان دے اعلیٰ سطحی سرکاری وفد وفاقی وزیر پٹرولیم ڈاکٹر مصدق ملک دی قیادت اچ پاکستانی وفد نال ملاقات کیتی ۔ آذربائیجان دے وفد دی قیادت وزیر توانائی پرویز شہبازوف کریندے پئے ہن ۔وفد اچ آذربائیجان دے نائب وزیر معیشت صاحب ممدوف، ایگزیکٹو ڈائریکٹر ایکسپورٹ اینڈ انویسٹمنٹ پروموشن ایجنسی یوسف عبدالائیف ،آذربائیجان دی سرمایہ کاری کمپنی دے ایگزیکٹو ڈائریکٹر الوی منصوروف، مشیروزیر ڈیجیٹل ڈویلپمنٹ و ٹرانسپورٹ ایلچن ممدوف، ساکر ٹریڈنگ دے گلوبل بزنس ڈویلپمنٹ دے سربراہ توگرال کوچارلی، انویسٹمنٹ پروموشن ڈیپارٹمنٹ دے سینئر سپیشلسٹ امین گلیئیف جݙاں جو پاکستانی وفد اچ وفاقی وزیر بجلی اویس لغاری، وفاقی وزیر مواصلات و نجکاری عبدالعلیم خان، وفاقی وزیر تجارت جام کمال خان، نیشنل کوآرڈینیٹر ایس آئی ایف سی لیفٹیننٹ جنرل سرفراز احمد اتے وفاقی سیکرٹریز شامل ہن۔ ملاقات اچ ڈاکٹر مصدق ملک ݙوہیں ملکاں وچال سانجھے مذہب، اتے ثقافتی رابطے دی بنیاد تے ݙوہیں ملکاں وچال تاریخی تعلقات دا ذکر کیتا تے آکھیے جو ملتان کاروان سرائے، صدیاں پراݨے ڳانڈھے دا ثبوت اے۔ پاکستانی وفد ݙوہیں ملکاں وچال تجارت اتے سرمایہ کاری دے تعلقات ودھاوݨ دے موقع بارے ݙسایا ڳیا ۔ ڈاکٹر مصدق ملک پاکستان اچ سرمایہ کاری دے موقع تے تفصیلی پریزنٹیشن ݙتی۔ انہاں آکھیے سانجھے تعلقات ودھاوݨ سانڳے اقتصادی رابطے کوں تکڑا کرݨ دی لوڑھ اے۔پاکستان خطے اچ تجارتی منڈیاں دے ودھارے تے وسطی ایشیا توں یورپ تئیں کھنڈی اقتصادی راہداریاں اچ سانجھے دار بݨݨ چاہندے ۔ انہاں کان کنی تے معدنیات خاص کر سونے اتے تانبے اچ سرمایہ کاری دے موقعیں داذکر کیتا، آذربائیجان کوں کان کنی اچ مہارت اے، او ایں شعبے اچ پاکستان نال تعاون ودھا سڳدے۔ ملاقات اچ تیل تے گیس دے شعبے اچ تعاون تے ڳالھ مہاڑ کیتی ڳئی ، پاکستان توانائی دی طلب دا وݙا مرکز اے۔ انہاں آکھیے ݙوہیں ملک رل تے آئی ٹی دی صلاحیت خاص کرمصنوعی ذہانت، مشین لرننگ، انسانی وسائل دی تربیت توں فیدہ چا سڳدن ۔وفاقی وزیر بجلی سردار اویس خان لغاری بجلی دے شعبہ اچ سرمایہ کاری دے موقع دا ݙسایا جیں اچ آذربائیجان دی سرمایہ کاری زیادہ منافع بخش ثابت تھی سڳدی اے۔ وفاقی وزیر تجارت جام کمال خان آذربائیجان دے صدر دے اڄوکے دورہ پاکستان اچ طے تھیوݨ آلے معاہدیں دی تعریف کیتی ۔ انہاں نجی شعبیں سانڳے جامع بریفنگ دی اہمیت تے زور ݙتا۔ آذربائیجان دے وفد ایں سلسلے اچ پیش کیتیاں ونڄݨ آلیاں تجویزاں اچ گھاٹی دلچسپی ݙکھائی تے ݙوہیں ملکاں وچال ورکنگ گروپس کوں تکڑا کرݨ دا عزم کیتے ۔ پرویز شہبازوف پاکستان اچ سرمایہ کاری دے موقع تے تفصیلی بریفنگ تے پاکستانی وفد دا شکریہ ادا کیتے۔ انہاں ورکنگ گروپس دے وختی اجلاس کراوݨ دی لوڑھ تے زور ݙتا۔ پاکستانی وفد پاکستان اچ آذربائیجان دی سرمایہ کاری اتے ایں معاملے تے تکھے پیشرفت سانڳے آپݨے عزم تے حمایت دا اعادہ کیتے۔ ݙوہیں فریقاں فوکل پرسنز مقرر کرݨ، منصوبیں دی چوݨ تے انہاں کوں منظوری سانڳے وختی قیادت دے سامݨے رکھݨ تے اتفاق کیتا۔
.jpg)
