اسلام آباد۔9جون(اے پی پی) وفاقی وزیر خزانہ سینیٹر محمد اسحاق ڈار آکھیے معیشت دی بہتری کیتے کجھ اہم فیصلے کرݨے پئن ، حکومت سیاست نی ریاست بچائو پالیسی تء عمل کیتے، ملکی معیشت دی بحالی کوں ترجیح ݙتی۔ قومی اسمبلی اچ بجٹ پیش کریندے ہوئیں انہاں آکھیے اتحادی حکومت دا ݙوجھا بجٹ پیش کرݨ دا اعزاز حاصل تھیندا پئے جیں تے خدا دا شکر گزار ہاں، معیشت دی بہتری کیتے کجھ اہم فیصلے کرݨے پئے جیڑھے ضروری ہن ۔ انہاں آکھیے سخت فیصلیں توں عوام کوں مہانگ تے غربت اچ ودھارے دا سامݨا کرݨا پیا ، روپے دی قدر اچ کمی معاشی مشکلات اچ ودھارا تھئے ، حکومت سیاست نی ریاست بچائو پالیسی تے عمل کیتے، اپݨی سیاسی ساکھ دی قربانی ݙے تے ملکی معیشت دی بحالی کوں ترجیح ݙتی ۔ انہاں آکھیے پی ٹی آئی دے دور اچ 1947 توں گھن تے 2018 دے مقابلے اچ انہاں دے چار سالاں اچ ساریں توں ودھ قرضہ ڳھدا ڳئے ۔ انہاں آکھیے مالی سال 24-2023 دے بجٹ دے اعداد و شمار پیش کرݨ توں پہلے 2017 اچ نواز شریف دی حکومت تے 2022 اچ پی ٹی آئی دی نااہل حکومت دے بجٹ دا تقابلی جائزہ پیش کریساں ۔انہاں آکھیے مالی سال 17-2016 اچ پاکستانی معیشت دی شرح نمو 6.1 فیصد تئیں پڄ چکی ہئی ، مہانگ 4 فیصد ہئی ، غذائی چیزاں دی مہانگ صرف 2 فیصد ہئی، پالیسی ریٹ ساڈھے 5 فیصد، اسٹاک ایکسچینج جنوبی ایشیا اچ نمبر ون اتے پوری دنیا اچ پنجویں نمبر تے ہئی۔
