لاہور۔28جنوری (اے پی پی):وزیراعظم عمران خان آکھیے جو حکومت راوی اربن ڈیویلپمنٹ منصوبے کوں کالعدم قرار ݙیوݨ دے ہائی کورٹ دے فیصلے دے خلاف سپریم کورٹ اچ اپیل دائر کریسی جتھاں اربن ڈیویلپمنٹ اتے شہری سہولتاں دے پس منظراچ ایں منصوبے دی اہمیت کوں اجاگر کریندے ہوئیں اینکوں بہترانداز اچ پیش کیتا ویسی ، منصوبہ بارے ہائوسنگ سوسائٹی ہووݨ دا تصور درست کائنی بلکہ اے شہراں دی بغیر کہیں منصوبہ بندی دے تعمیر اچ تھیوݨ آلیاں غلطیاں کوں درست کرݨ دا وݙا منصوبہ اے ،ݙو کروڑ ٻوٹے لاوݨ ، زیر زمین پاݨی دی ڈھاندی ہوئی سطح کوں اچا کرݨ تے سیوریج دی فلٹریشن ایں منصوبے دی خصوصیات ہن ، 20 ارب ڈالر دے ایں منصوبے اچ 1.5 ارب ڈالر دی سرمایہ کاری تھی چکی اے تے مزید غیر ملکی سرمایہ کاری دی حوصلہ افزائی تھیسی جیں توں روزگار دے موقع پیدا تھیسن ، اے ڳال انہاں جمعے کوں رکھ جھوک اچ آپݨے دورے دے دوران آکھی اے ۔وزیر اعظم آکھیے جو راوی اربن ڈیویلپمنٹ منصوبہ پاروں لاہورھک نواں شہر بݨݨ ویندا پئے ،اسلام آباد دے بعد پلاننگ دے تحت پہلی واری لاہور ݙوجھا وݙا شہر ہوسی ، ایں منصوبے دے تحت ہی دریائے راوی دا بچائو ممکن اے ۔پاکستان تحریک انصاف دی حکومت اوپہلی حکومت اے جیں ماحولیاتی آلودگی مکاوݨ دا ذمہ چاتے ،20 ارب ڈالر دے منصوبہ توں غیر ملکی فنڈنگ اتے سرمایہ کاری پاکستان آسی ،منصوبہ توں نہ صرف ملازمتاں دے نویں موقع بݨسن بلکہ ملک اچ 30 توں 40 نویاں صنعتاں وی لڳسن ۔ وزر اعظم آکھیے جو لاہور ہائیکورٹ اچ راوی اربن ڈویلپمنٹ پراجیکٹ کوں صحیح طریقے نال پیش نی کیتا ڳیا ،حکومت ایں فیصلے دے خلاف سپریم کورٹ اچ اپیل دائر کریسی جتھاں اربن ڈیویلپمنٹ اتے شہری سہولتاں دے پس منظراچ منصوبے دی اہمیت کوں اجاگر کریندے ہوئیں اینکوں بہتر انداز اچ پیش کیتا ویسی ۔
