اسلام آباد ۔28مئی(اے پی پی) پاک بحریہ دے جہاز شاہجہاں لنگکاوی انٹرنیشنل میری ٹائم اینڈ ایرو اسپیس نمائش (لیما-23) اچ شرکت کیتی اے ،جہاز دی شرکت دا مقصد ݙو طرفہ تعلقات کوں مضبوط بݨاوݨ تے نمائش اچ شریک بحری افواج وچال سانجھے تعاون کوں فروغ ݙیوݨ اے ۔ پاکستان نیوی دی طرفوں جاری بیان موجب پورٹ لنگکاوی پڄݨ تے ملائیشیا اچ پاکستان دے دفاعی اتاشی اتے ملائیشین نیوی دے حکام جہاز دا پرتپاک استقبال کیتا۔ ملائیشین حکام نال ملاقاتاں دے دوران جہاز دے کمانڈنگ آفیسر چیف آف دی نیول سٹاف ایڈمرل محمد امجد خان نیازی دی طرفوں ملائیشیا دے عوام کیتے بالعموم اتے ملائیشین نیوی کیتے بالخصوص نیک خواہشات دا اظہار کیتے۔ایں توں انڄ سانجھی دلچسپی دے امور، فوطرفہ تعاون،علاقائی امن اتے بحری سلامتی دے ودھارے اچ پاک بحریہ دے کردار تے وی ڳالھ مہاڑ کیتی ۔پی این ایس شاہجہاں لنگکاوی اچ بین الاقوامی فلیٹ ریویو اچ شرکت کیتی جیں دا مشاہدہ ملائیشیا دے وزیراعظم کیتا ۔ ایندے نال نال ، جہاز دے افسران اتے عملے میری ٹائم انٹرڈکشن آپریشنز تے مختلف کانفرنسز، ٹیبل ٹاپ ڈسکشنز اتے نالج شیئرنگ سیشنز اچ حصہ ڳھدا ۔ بندرگاہ دی سرگرمیاں مکمل تھیوݨ تے پی این ایس شاہجہاں برونائی، چین، انڈونیشیا، اٹلی، جاپان، جمہوریہ کوریا، سنگاپور، تھائی لینڈ، امریکا اتے ٻئے بحری افواج دے جنگی جہازاں دے رلے لیما سمندری مشق اچ وی حصہ ڳھدا ۔پی این ایس شاہجہان دے دورہ ملائیشیا مختلف بحری ملکاں دے درمیان بحری تعاون کوں ودھارا ݙیوݨ تے ملائیشیا دے نال ݙوطرفہ تعلقات اتے موجودہ دوستی کوں مضبوط بݨاوݨ اچ اہم کردار ادا کیتے۔
