اسلام آباد۔9جنوری (اے پی پی) صدر مملکت عارف علوی دی صدارت خصوصی لوکاں دی ملازمت دے کوٹہ تے عمل بارے اجلاس منگل کوں تھیا۔ اجلاس اچ سیکرٹری وزارت انسانی حقوق، سیکرٹری فیڈرل پبلک سروس کمیشن اتے سپیشل سیکرٹری اسٹیبلشمنٹ ڈویژن سودھے اعلیٰ حکام شریک تھیے۔ صدر مملکت ڈاکٹر عارف علوی معذور لوکاں دی مالیاتی خودمختاری کیتے حکومتی سطح تے ملازمت دے کوٹہ تے عملدرآمد دی لوڑھ تے زور ݙیندیں ہوئیں آکھیا جو سرکاری ادارے معذوراں کیتے موزوں ملازمتاں دی نشاندہی کرن۔ انہاں آکھیا جو اسٹیبلشمنٹ ڈویژن ساری وزارتاں/ ڈویژناں/محکمیاں نال ݙوفیصد ملازمتاں دے کوٹہ کیتے بھرپور طریقے نال کم کریندی پئی اے۔ صدرمملکت معذوراں دے حقوق کیتے وزارتاں دے تعاون دی تعریف کیتی۔
