اسلام آباد۔ 17 اگست (اے پی پی) اکادمی ادبیاتِ پاکستان ولوں سہ روزہ نسلِ نَو ادبی میلے دے ݙوجھے ݙینھ تربیتی نشستاں (ورکشاپس) دا اختتام تھی ڳیا۔ اکادمی ادبیات دے فیض احمد فیض آڈیٹوریم اچ پُروقار اختتامی اجلاس تھیا جیندے اچ ورکشاپس اچ کامیابی نال شریک تھیوݨ آلے نینگراں کوں خصوصی سندات نال نوازیا ڳیا۔ پروفیسر جناب فتح محمد ملک مہمانِ خصوصی ہن ۔ صدر نشیں اکادمی ادبیات ڈاکٹر نجیبہ عارف خطبہ استقبالیہ جݙاں جو ناظمِ اعلیٰ سُلطان ناصر تقریب دے اخیر تے سپاس نامہ پیش کیتا۔ نظامت عائشہ مسعود ملک کیتی۔ قاری محمّد سجاد کلامِ پاک دی تلاوت کیتی جݙاں جو اقدس ہاشمی نعتِ رسولِ مقبول (صلی اللہ علیہ و آلہ وسلّم) پیش کیتی۔ ورکشاپ اچ حصّہ گھنݨ آلے پنج پنچ نینگر شرکاء وی آپدے تاثرات دا اظہار کیتا تے خوب داد ڳھدی۔
صدر نشیں اکادمی ادبیات ڈاکٹر نجیبہ عارف مسرت تے انبساط دا اظہار کیتا جو اکادمی دے پلیٹ فارم توں ملک بھر دے مختلف علاقیاں دے نینگراں ، طلبا تے طالبات سہ روزہ ادبی میلے اچ شرکت کیتی تے تربیتی ورکشاپ اچ ودھ چڑھ تے حصہ ڳھدا۔ انھاں آکھیا جو اکادمی دے محدود وسائل دے باوجود ساݙے توں جتی تھی سڳیا ، سہولتاں ݙتیاں ڳیاں ۔ ڈاکٹر نجیبہ عارف دا آکھݨ ہا جو اکادمی نینگراں تے اہلِ قلم وچال مکالمے دا اہتمام کیتا تاں جو نینگراں تئیں ادبی ورثہ منتقل ہووݨ دی راہ ہموار تھیوے ۔
ایں میلے اچ اکادمی ادبیات پاکستان ولوں پنج تربیتی نشستاں (ورکشاپس) دا اہتمام کیتاگیا ھا: علم عروض، تخلیقی نثر نگاری، ترجمہ نگاری، ادبی ادارت، اتے حقوق ملکیت دانش۔ ہر ورکشاپ اچ بھرپور شریک تھیوݨ آلے ہک ہک نینگرکوں اجلاس اچ سٹیج تے آپدے تاثرات دا اظہار کرݨ دی دعوت ݙتی ڳئی۔ علمِ عروض اچ تہذیب الحسن ، تخلیقی نثر نگاری اچ سیدہ ہما نے، ترجمہ نگاری اچ حمزہ افتخار ، ادبی ادارت اچ حسن شہزاد راجہ اتے حقوقِ ملکیتِ دانش اچ آسیہ عارف آپدے آپدے تاثرات پیش کیتے ۔ نینگراں ورکشاپ توں فیدہ چاتا تے انھاں دا آکھݨ ہئی جو ایں میلے دی تربیتی نشستاں، تخلیق کاراں نال مکالمے ، اتے شخصی تے تہذیبی تربیت دے اجلاس دا اثر ہمیشہ اُنھاں دے ذہناں اچ محفوظ رہسی۔(ڈاکٹر سعدیہ کمال)
