اسلام آباد۔6جون (اے پی پی) سپریم کورٹ بہائوالدین زکریا یونیورسٹی (بی زیڈ یو)ملتان اچ مبینہ نقلی لا ء سٹوڈنٹس دے داخلیں متعلق کیس دی سماعت غیر معینہ مدت تئیں ملتوی کرݙتی ۔ عدالت عظمی بہائوالدین زکریا یونیورسٹی دے لاء سٹوڈنٹس کوں امتحان ݙیوݨ دی اجازت ݙیندے ہوئیں قرار ݙتے جو امتحانات دے بعد لاء طلباء دا سارا ریکارڈ عدالتی حکم دے تحت قائم کمیٹی کوں بھجوایا ویسی ۔ سپریم کورٹ کمیٹی توں طلباء دے امتحانات دے بعد ݙو ہفتے اچ لاء سٹوڈنٹس دے داخلیں متعلق رپورٹ منگ ڳھدی ۔ سنوار کوں جسٹس اعجاز الاحسن دی سربراہی اچ ترائے رکنی بینچ معاملے تے سماعت کیتی ۔ دوران سماعت وفاقی وزیر قانون و انصاف اعظم نزیر تارڑ عدالت دے سامݨے پیش تھئے اتے موقف اپنایا جو مذکورہ یونیورسٹی اچ 14 ہزار نقلی لاء سٹوڈنٹس دے داخلے سامݨے آئن ،سپریم کورٹ 2018ء اچ ترائے سالہ لا ء ڈگری ختم کرݨ دا حکم ݙتا ہئی ۔ ایں دوران پاکستان بار کونسل دے وکیل عدالت کوں ݙسائے جو عدالتی حکم تے بہاؤ الدین زکریا یونیورسٹی کہیں کالج کوں ڈی ایفیلیٹ نی کیتا ۔ بہائوالدین زکریا یونیورسٹی دے وکیل ایں موقع تے موقف اپنائے جو 2016 دے داخلیں دے ہی ہݨ امتحانات ڳھدے ویندے پئن ،38 لا ء کالجز بہاو الدین یونیورسٹی نال جڑیے ہوئن ۔ سماعت ویلھے جسٹس اعجازالاحسن ریمارکس ݙتے جو 2016 دے داخلیں دا امتحان ہݨ 2022ء اچ گھنݨ دی سمجھ نی آندی ،ھک سیشن اچ 14 ہزار داخلے سمجھ توں ٻہر ہن ،ھک ھک کمرے دے لا ءکالجز بݨائے ڳئن ،اے تاں پیسہ کماوݨ کیتے ھک کاروبار بݨ چکیے ،سپریم کورٹ 32 لاء کالجز کوں فوری طور تے ڈی ایفیلیٹ کرݨ دا حکم ݙتا ہئی ،عدالتی حکم دے باوجود جعلی کالجز دی یونیورسٹی توں ایفیلیشنز ختم نی کیتی ڳئی ،سکروٹنی دے عمل اچ ایف آئی اے کوں وی شامل کریسوں ، نقلی داخلے کوئی چھوٹا سکینڈل کائنی ۔جسٹس منیب اختر ریمارکس ݙتے جو ایف آئی اے کوں شامل کیتا یا امتحانات روکیے تاں چھی سال کجھ نہ تھیسی ،جینوئن طالب علماں دے حقوق دا تحفظ کرݨا اے ۔ جسٹس مظاہر علی اکبر نقوی ریمارکس ݙتے جو وائس چانسلر دے خلاف عدالتی حکم تے عمل درآمد نہ کرݨ تے توہین عدالت دی کارروائی بݨدی اے ۔ عدالت عظمی بہائوالدین زکریا یونیورسٹی دے لاء سٹوڈنٹس کوں امتحان ݙیوݨ دی اجازت ݙیندے ہوئیں قرار ݙتے جو امتحانات دے بعد لاء طلباء دا سارا ریکارڈ عدالتی حکم دے تحت قائم کمیٹی کوں بھجوایا ویسی ۔ سپریم کورٹ کمیٹی توں طلباء دے امتحانات دے بعد ݙو ہفتیں اچ لاء سٹوڈنٹس دے داخلیں متعلق رپورٹ منگ ڳھدی ۔واضح رہے 2018 ء اچ سپریم کورٹ نقلی لاء اسٹوڈنٹس داخلیں متعلق کمیٹی قائم کرتے بی زیڈ یو کوں 32 لاء کالجز کوں ڈی ایفلیٹ کرݨ دا حکم ݙتا ہئی ۔
