اسلام آباد۔14مارچ(اے پی پی):وفاقی وزیر ماحولیاتی تبدیلی شیری رحمان آکھیے ماحولیاتی تبدیلیاں انسانی زندگیاں کیتے ٻہوں وݙا خطرہ ہن ،انہاں توں پیدا تھیوݨ آلے مسئلیں کوں اداریں دے سانجھے تعاون نال سوکھیں حل کیتا ونڄ سڳدے ۔ دنیا دے ٻہوں سارے خطے گلیشئرز دے پگھلݨ تے ہیٹ ویوزتوں متاثر تھیندے پئن ،بہار دا موسم تقریباً ختم تھی ڳئے ۔ نیشنل ڈیزاسٹر مینجمنٹ اتھارٹی( این ڈی ایم اے )دے زیر اہتمام نیشنل ایمرجنسی آپریشنز سینٹر (این ای او سی) اتے ٻئے وفاقی و صوبائی ایمرجنسی سروسز دے اداریں دی فرضی مشقاں دے افتتاحی سیشن توں خطاب کریندے ہوئیں وفاقی وزیر شیری رحمان آکھیے قدرتی آفات توں ضیان کوں گھٹ توں گھٹ کرݨ کیتے متعلقہ اداریں اچ ہم آہنگی ضروری اے،قدرتی آفات دے بعد پہلا کم بنیادی ڈھانچے دی بحالی اے۔کوئی وی ملک قدرتی آفات دا نقصان محض اپݨے بل بوتے تے برداشت نی کرسڳدا ۔ قدرتی آفات دے بعد دوست ملک ہی پہلے مدد کوں پڄدن ۔ شیری رحمان آکھیے سیلاب توں پاکستان کوں وݙے پیمانے تے نقصانات دا سامݨا کرݨا پوندے ،متاثرین کوں ریسکیو اتے انہاں دی بحالی دے کماں اچ این ڈی ایم اے ،پی ڈی ایم اے اتے ݙوجھے اداریں رل تے کم کیتے جیں تے ادارے داد دے مستحق ہن ۔
