اسلام آباد۔20دسمبر(اے پی پی)حکومت توانائی دی بچت اتے کفایت شعاری کیتے توانائی بچت قومی پروگرام دا اعلان کریندے آکھیے جو توانائی بچت کیتے شادی ہالز رات 10 وڄے، مارکیٹاں اتے ریسٹورنٹ رات 8 وڄے بند کیتے ویسن، معاشی صورتحال سانڳے ساکوں اپݨیاں عادتاں وٹاوݨیاں ہوسن۔ وفاقی کابینہ دے اجلاس دے بعد میݙیا بریفنگ ݙیندے وفاقی وزیر اطلاعات و نشریات مریم اورنگزیب، وزیراعظم دے مشیر برائے امور کشمیر و گلگت بلتستان قمر زمان کائرہ اتے وزیر دفاع خواجہ آصف آکھیے جو اوکھے معاشی حالات پاروں کفایت شعاری پالیسی اپنائی ویندی پئی اے، ایں سانڳے ہک کمیٹی ٻݨائی ڳئی اے جیندے اچ سیکرٹری پاور، وزیردفاع سودھا ٻئے وزیر شامل ہوسن۔ انہاں آکھیا جو بازار اتے ریسٹورنٹ رات 8 وڄے، شادی ہال رات 10 وڄے بند کیتے ویسن، 20 فیصد سرکاری ملازمین گھرو ٻیہ تے کم کریسن جو توانائی بچا تے معیشت کوں تھیوݨ آلے نقصان توں بچیا ونڄ سڳے، ایندے نال 8 توں 9 ہزار میگاواٹ بجلی اتے 62 ارب روپے بچسن، ایں سانڳے صوبیاں توں وی تجویزاں منڳیاں ویسن، توانائی بچت دا اے قومی پروگرام اے۔ خؤاجہ آصف آکھیا جو ای بائیکس متعارف کرایاں ویسن، ایں سانڳے الیکٹرک بائیکس دی درآمد شروع اے، پراݨے دی ڄاہ تے بچلی دی ودھ بچت آلے نویں پکھے، ایل ای ڈی بلب لائے ویسن جیندے نال کل 38 ارب روپے دی بچت تھیسی، انہاں آکھیا جو کپیسٹی پے منٹس نال ماہانہ 28 ارب بچسن، گیس ݙیوݨ آلیآں کمپنیاں گیزر کیتے بچت آلات ݙیسن، متبادل سٹریٹ لائٹس کوں ترجیح ݙتی ویسی، فلڈ ایری گیشن زرعی مقاصد کیتے استعمال کیتا ویسی، واٹر ہارویسٹنگ تھیسی، اے قومی بچت پروگرام اے جیکوں اتفاق رائے نال چلایا ویسی اتے خمیس تئیں کفایت شعاری پالیسی کوں حتمی شکل ݙے ݙتی ویسی۔
