اسلام آباد۔5مارچ(اے پی پی) وزیراعظم شہباز شریف قطری سرمایہ کاراں کوں پاکستانی حکومت دی سرمایہ کاری دوست پالیسیاں توں فیدہ چاوݨ دی دعوت ݙیندے ہوئیں آکھیے جو ݙوہیں ملک اپݨے اقتصادی تعلقات کوں مضبوط بݨاوݨ تے قطر دے ویژن 2030 دے مطابق مستقبل اچ انہاں کوں مزید متنوع بݨاوݨ کیتے رل تے کم کرݨ کیتے پرامید ہن ۔ وزیراعظم آفس دے پریس ونگ توں جاری بیان موجب قطر انویسٹمنٹ اتھارٹی دے سی ای او منصورابراہیم المحمود دوحہ اچ وزیراعظم محمد شہباز شریف نال ملاقات کیتی جیں اچ پاکستان دی معیشت دے ٻہوں سارے شعبیں اچ سرمایہ کاری دی مختلف تجاویز تے پیش رفت تے ڳالھ مہاڑ کیتی ڳئی ۔ ملاقات اچ پاکستان دے توانائی اتے بنیادی ڈھانچے دے شعبیں اچ سرمایہ کاری دے مواقع تے روشنی پاتی ڳئی ۔ یاد رہے جو اگست 2022 اچ وزیراعظم دے دورہ قطر دے دوران ݙوہیں فریقین وچال تفصیلی ڳالھ مہاڑ دا آغاز تھیا ہئی ۔ قطر انویسٹمنٹ اتھارٹی پاکستان اچ ایل این جی پاور پلانٹس، ایئرپورٹس اتے سولر پاور پارکس اچ سرمایہ کاری کرݨ اچ گھاٹی دلچسپی دا اظہار کیتے۔ منصور ابراہیم المحمود قطر اتے پاکستان دے درمیان ݙوطرفہ تجارت اتے سرمایہ کاری دی اہمیت دے حوالے نال وی وزیراعظم نال اتفاق کیتے تے ݙو پاسے اقتصادی تعلقات کوں مضبوط بݨاوݨ دی خواہش دا اظہار کیتے۔ وزیراعظم پاکستان نال اقتصادی شعبے اچ تعاون ودھاوݨ اچ دلچسپی تے انہاں دا شکریہ ادا کیتے تے قطری سرمایہ کاراں کوں پاکستانی حکومت دی سرمایہ کاری دوست پالیسیاں توں فیدہ چاوݨ دی دعوت ݙتی ۔ ݙوہیں ملک آپݨے اقتصادی تعلقات کوں مضبوط بݨاوݨ تے قطر دے ویژن 2030 دے مطابق مستقبل اچ انہاں کوں مزید متنوع بݨاوݨ کیتے رل تے کم کرݨ کیتے پرامید ہن ۔
