لاہور/اسلام آباد۔18جون(اے پی پی) وزیراعظم محمد شہبازشریف یونان اچ بیڑے بݙ ونڄݨ دے حادثے اچ پاکستانیاں دے جاں بحق تھیوݨ دا سخت نوٹس گھندے ہوئیں واقعے دی تحقیقات کیتے چار رُکنی اعلی سطح کمیٹی بݨا ݙتی اے ، وزیر اعظم کل سنوار کوں یوم سوگ مناوݨ دا اعلان کیتے ، یوم سوگ دے موقع تے قومی پرچم جھکا رہسی تے جاں بحق تھیوݨ آلیں کیتے خصوصی دعا کیتی ویسی ۔ وزیر اعظم آفس میڈیا ونگ توں اتوار کوں ڄاری بیان موجب وزیراعظم یونان اچ 14 جون کوں تھیوݨ آلے بیڑی حادثے دا سخت نوٹس گھندے ہوئیں واقعے دی تحقیقات کیتے چار رُکنی اعلی سطح کمیٹی وی تشکیل ݙے ݙتی، نیشنل پولیس بیورو دے ڈائریکٹر جنرل احسان صادق کمیٹی دے چئیرمین مقرر کیتے ڳئن جݙاں جو وزارت خارجہ دے ایڈیشنل سیکرٹری (افریقہ)جاوید احمد عمرانی کوں کمیٹی دا رکن مقرر کیتا ڳئے ، ایویں آزادجموں وکشمیر پونچھ ریجن دے ڈی آئی جی سردار ظہیراحمد اتے وزارت داخلہ دے جوائنٹ سیکرٹری (ایف آئی اے) فیصل نصیر وی کمیٹی اچ شامل ہن ۔ بیان موجب کمیٹی یونان اچ بیڑی ٻݙ ونڄݨ دے سارے حقائق جمع کریسی تے انسانی سمگلنگ دے پہلودی تحقیق تھیسی تے ذمے واراں دا تعین کیتا ویسی ، عالمی سطح تے ایں مسئلے دے حل کیتے تعاون اتے اشتراک عمل دی تجاویز ݙتی ویسی۔ ایں توں انڄ درمیانی تے لمبی مدت قانون سازی دا جائزہ ڳھدا ویسی ، ایہو سویں واقعات دا سبب بݨݨ آلے لوکاں ، کمپنیاں اتے ایجنٹاں کوں سخت سزا ݙیوݨ کیتے قانون سازی تھیسی ،کمیٹی ھک ہفتے اچ رپورٹ وزیراعظم کوں پیش کریسی تے کمیٹی دی رپورٹ دی روشنی اچ مزید کارروائی عمل اچ گھن آئی ویسی ۔
